مهام مهندس المكتب الفنى وكيف تصبح مهندس مكتب فنى ؟

مهام مهندس المكتب الفنى وكيف تصبح مهندس مكتب فنى ؟

مهام مهندس المكتب الفنى وكيف تصبح مهندس مكتب فنى ؟ 

تعرف إيـــه عن المكتـــب الفني...؟؟؟ 

كتير من المهندسين حديثي التخرج والطلبة ممكن يكونوا مش عارفين إيه المقصود تحديداً بمصطلح "مكتب فني" و إيه هي مهام قسم المكتب الفني ومهندسي المكتب الفني
هل شغل المكتب الفني يعتبر حاجة متميزة.. هل هو الأفضل والأنسب ليك ولا شغل التصميم أو التنفيذ.. إيه الفرق بين تخصصات المكتب الفني وتخصصات إدارة المشروعات.. إيه هي أقسام المكتب الفني.. متوسط رواتب مهندسين المكتب الفني.. إزاي تبقى مؤهل إنك تبدأ تشتغل كمهندس مكتب فني.. إزاي تحترف شغل المكتب الفني.. إزاي تدور على شغل مكتب فني في الشركات الكبرى.. إيه أهم الكتب اللي ممكن تساعدك كمهندس مكتب فني.. طب هل شغل المكتب الفني مناسب للمهندسات.. هل بيقتصر على قسم مدني فقط ولا مدني وعمارة ولا أقسام تانية.... إلخ

إحنا لما بنتخرج من قسم مدني أو عمارة في الغالب بشتغل في شركة إما تكون شركة مقاولات أو مكتب إستشاري أو شركة مالكة زي شركات الإستثمار العقاري .أي شركة من الشركات دي بيكون عندها أقسام مختلة داخل الشركة.. أحد أهم الأقسام دي على الإطلاق هو قسم المكتب الفني بمعنى إن سواء الشركة اللي هتشتغل فيها كانت مقاولات أو إستشارات أو مالك فبالتأكيد هيكون عندهم قسم مكتب فني

إيه هي وظايف ومهام قسم المكتب الفني في الشركات المختلفة

مهام قسم المكتب الفني لدى الاستشارى 

1. مسئول عن إعداد المقايسات الخاصة بالمشاريع (قوائم الكميات)
2. مسئول عن إعداد مستندات الطرح الخاصة
3. مسئول عن إعداد حصر الكميات المبدئي للمشروع
4. مسئول عن حساب القيمة التقديرية المبدئية لتكلفة المشروع
5. مسئول عن الإشراف على طرح مناقصة المشروع والمفاضله بين العطاءات المقدمة من شركات المقاولات وتقييمها
6. مسئول عن مراجعة لوحات الـ Shop Drawing و الـ As-built Drawing المقدمة من شركات المقاولات
7. مسئول عن مراجعة حصر الكميات والمستخلصات المقدمة من شركات المقاولات واعتمادها
8. مسئول عن اعتماد الخامات والعينات طوال فترة المشروع
9. مسئول عن مراجعة أي تعديلات باللوحات أثناء فترة التنفيذ
10. مسئول عن توثيق جميع مستندات المشروع طوال فترة التنفيذ
11. مسئول عن متابعة معدل سير الأعمال بالمشروع
12. إعداد التقارير الأسبوعية والشهرية وتقديمها للمالك

مهام قسم المكتب الفني لدى شركات المقاولات 

1. مسئول عن دراسة مستندات المشروع وتسعير المقايسة
2. مسئول عن تجهيز مستندات تقديم العطاء
3. مسئول عن إعداد الحصر الهندسي للبنود المنفذة على مدار فترة المشروع
4. مسئول عن إعداد مستخلصات المالك ومستخلصات مقاولي الباطن
5. مسئول عن إعداد لوحات الـ Shop Drawing ولوحات الـ As-built Drawing على مدار فترة المشروع
6. مسئول عن إعداد وتوثيق وإستلام جميع المستندات الورقية الخاصة بالمشروع من مخاطبات وتقارير وطلبات فحص ونتائج اختبارات واعتمادات وتعديلات لوحات وبرامج زمنية... إلخ
7. مسئول عن عمل تحليل الأسعار للبنود المستجدة بالمشروع
8. مسئول عن مطابقة لوحات المشروع
9. مسئول عن الـ Coordination الخاص بالمشروع
10. مسئول عن إعداد تعديلات الأسعار في حالة تغير أسعار الخامات
11. مسئول عن حساب الكميات اللازمة من جميع الخامات لتنفيذ البنود بالموقع
12. مراقبة التكاليف الخاصة بالتنفيذ طوال فترة المشروع
13. مسئول عن إعداد المطالبات المالية Claims
14. إعداد التقارير الأسبوعية والشهرية وتقديمها للإستشاري

مهام قسم المكتب الفني لدى المالك

1. مراجعة واعتماد جميع مستندات المشروع المقدمة من الإستشاري
2. اعتماد مستخلصات المشروع وتقديمها للإدارة المالية تمهيداً لصرفها
3. متابعة تنفيذ بنود التعاقد على أكمل وجه
4. متابعة البرنامج الزمني للمشروع
5. إعداد التقارير الدورية الخاصة بتمويل المشروع
6. متابعة الـ Cash Flow للمشروع طوال فترة التنفيذ
7. توثيق وحفظ جميع مستندات المشروع بصفة دورية طوال فترة التنفيذ

هل شغل المكتب الفني يختلف عن إدارة المشروعات؟

الطبيعي في الشركات الكبرى إن بيكون عندهم قسم خاص بالمكتب الفني وقسم منفصل لإدارة المشروعات وكل قسم منهم بيقوم بدوره على أكمل وجه، ولكن في الشركات الصغيرة وبعض الشركات المتوسطة الموضوع بيكون مختلف لأن كتير بيكون قسم المكتب الفني فقط هو اللي بيقوم بدور مهام المكتب الفني وإدارة المشروعات.
بشكل عام المكتب الفني هو المسئول عن إعداد المقايسات و حصر الكميات و إعداد المستخلصات وإعداد الـ Shop Drawing و الـ As-built drawing والدورة المستندية للمشروع
أما قسم إدارة المشروعات هو المسئول عن دراسة المناقصات والعطاءات وتحليل الأسعار وإعداد العقود وتقييمها وحساب ومراقبة التكاليف وإعداد ومتابعة البرامج الزمنية Time Schedule الخاصة بالمشروع

إيه هي مزايا العمل بقسم المكتب الفني؟

• تنوع الخبرات.. لأن قسم المكتب الفني يعتبر هو حلقة الربط بين جميع شركات وأقسام وتخصصات المشروع، حلقة الوصل بين المالك والإستشاري والمقاول العام ومقاولين الباطن.. وداخل الشركة الواحدة بيكون على تواصل دائم مع الإدارة المالية والمخازن وإدارة التنفيذ والشئون القانونية.... إلخ
• مهندس المكتب الفني بيتواصل مع الجهات الخارجية الخاصة بالتصاريح والتراخيص وبيتواصل مع الموردين والمصانع وشركات كبرى وده بيصقل علاقاته بشكل كبير
• مهندس المكتب الفني لأنه بيبقى ملم بالتصميم والتنفيذ في نفس الوقت بحكم طبيعة شغله في الربط بين اللوحات والموقع
• شغل المكتب الفني باستمرار بيكون فيه تحديات جديدة لأنه مسئول عن حل أغلب المشاكل الخاصة بالمشروع
• شغل المكتب الفني مش روتيني زي شغل التصميم ومش متعب ومرهق زي شغل الموقع
• سرعة الترقية.. لأن مهندس المكتب الفني باستمرار بيحضر الإجتماعات الدورية بالشركة مع الإدارات العليا فده بيخليه ليه حضور وظهور مستمر وده بيساعد بشكل كبير المهندسين المتميزين على الترقيات
• الإستقرار الوظيفي.. لأن مهندس المكتب الفني بطبيعة شغله بيكون في إيده أهم خيوط وأوراق ومستندات المشروع فمش بسهولة إن الشركة تستغنى عن مهندس المكتب الفني إلا بعد توفير بديل وتسليمه الشغل بطريقة مناسبة.. وده بينعكس على الـ benefits اللي هتعود عليك كمهندس مكتب فني
• سقف طموح غير محدود.. وده من أهم مزايا قسم المكتب الفني.. إن بصفة مستمرة تقدر تعلى في شغلك وتمسك شغل جديد بمنصب جديد.. لأن المكتب الفني بداخله تخصصات كتير ممكن تمر بيها كلها
• بوابة لإدارة المشروعات.. من المزايا الرائعة في شغل المكتب الفني إنه بيؤهلك بشكل كبير للعمل بقسم إدارة المشروعات
• إحتراف البرامج الهندسية.. وده لأن أغلب شغل مهندسي المكتب الفني بيكون على البرامج فده بيطور مهاراتك بشكل كبير في تعلم واتقان أغلب البرامج الهندسية وده بالتأكيد هيفيدك في أي شغل مستقبلاً
• الرواتب.. نسبياً تعتبر رواتب مهندسي المكتب الفني من أعلى الرواتب في سوق العمل مقارنةً بباقي التخصصات
• فرص العمل.. نظراً لأن قسم المكتب الفني بيكون متواجد داخل كل الشركات اللي بتعمل بمجالات وتخصصات التشييد المختلفة فده بيخلي الطلب على مهندسي المكتب الفني بيكون كبير نسبياً
• سهولة التعلم.. على قد ماشغل المكتب الفني مهم ومتنوع إلا إنه سهل التعلم للمهندسين حديثي التخرج.. وممكن بسهولة تتقنه وتتمكن منه في فترة زمنية بسيطة ومش محتاج خبرة كبيرة عشان تبدأ
• من المزايا المهمة في شغل المكتب الفني هو إنه مطلوب في كل المجالات.. بمعنى إنك ممكن تشتغل ممكتب فني خرسانات أو تشطيبات أو مكتب فني طرق أو صحية أو Steel .. إلخ
• شغل المكتب الفني مناسب لمهندسين مدني وعمارة على السواء.. مش بس كدة.. ده مناسب لمهندسين ميكانيكا وكهرباء.. إلخ في تخصصاتهم

شغل المكتب الفني مناسب لمين؟

مناسب للمهندسات.. مناسب للمهندسين الشباب اللي اشتغلوا فترة في الموقع وحاسين إنهم تحولوا لمقاولين وقربوا ينسوا الهندسة.. مناسب للمهندسين اللي ملت من التصميم وحابه تغير.. مناسب للي حابين مستقبلاً يشتغلوا بإدارة المشروعات.. مناسب للمهندسين اللي شخصيتهم مش مناسب ليها الموقع.. مناسب للي لأسباب صحية ظروف الموقع مش مناسبة ليهم.. مناسب لأي مهندس طموح وحابب يوصل إنه يأسس شركة مقاولات..

إزاي تبقى مهندس مكتب فني متميز؟

• لو انت لسه طالب يفضل (وليس شرط) إنك تختار مشروع تخرج إدارة مشروعات لأنك خلال المشروع هتدرب على جزء كبير من شغل المكتب الفني
• اتعلم تنفيذ قدر استطاعتك (مهم جداً) لأن شغل المكتب الفني بيعتمد بشكل كبير على فهمك لشغل الموقع.. إنزل تدريب.. اقرا كتب.. اتفرج على فيديوهات.. كورسات تنفيذ.. إلخ
• اتقن برنامجي الـ MS WORD والـ MS EXCEL اتقان تــــام
• اتعلم AUTOCAD ويفضل إنك تحترفه قدر استطاعتك
• يفضل (وليس شرط) إنك تتعلم ASD و Autorebar
• لو حابب تكون متميز عن غيرك يبقى اتعلم PRIMAVERA أو MS PROJECT
• لو بتفكر تشتغل في شركة كبيرة أو تسافر بره مصر اتعلم REVIT
• خد فكرة عن برنامج Cutting optimization عشان هتحتاجه
• لو بتحب القراءة ننصحك بالكتب دي ( الكود المصري لإدارة مشروعات التشييد- كتب المواصفات القياسية المصرية- دليل التفاصيل الإنشائية- كتاب إدارة مشروعات التشييد للدكتور إبراهيم عبد الرشيد- دراسة العطاءات للمهندس محمود المصيلحي- حساب كميات الأعمال للدكتور السيد القصبي- عقود و مواصفات للدكتور السيد القصبي- قانون المناقصات و المزايدات المصري وقانون التعاقدات)
• لو ظروفك ووقتك يسمحوا انك تحضر كورس مكتب فني فأكيد دي هتكون من الخطوات المهمة، لو لأي سبب مش هتقدر يبقى تحاول تركز على فيديوهات شرح وكتب للمكتب الفني
• بعد التخرج وبعد ماتبدأ شغل مكتب فني.. لو حابب تتجه لإدارة المشروعات يبقى أنسب بداية ليك هي دبلومة PRMG بالجامعة الأمريكية.. وبعد 3 سنين من تخرجك تمتحن امتحان الـ PMP

نصائح هامة لأي مهندس حابب يشتغل في المكتب الفني 

• حاول باستمرار تكون مذاكر مستندات المشروع وتركز في كل تفاصيلها قبل ماتشتغل
• مهم إنك تكون على دراية كافية بالأكواد والمواصفات والتفاصيل الإنشائية والمعمارية المتعلقة بشغلك
• يفضل ماتشتغلش في تخصص واحد فقط في المكتب الفني وتفضل لفترة طويلة.. يعني ماتبقاش مهندس حصر فقط أو شوب درووينج فقط.. حاول تجمع أكبر قدر ممكن من الخبرات المتنوعة في المكتب الفني
• حاول تحضر أكبر قدر ممكن من الإجتماعات
• اهتم جداً بتوثيق وتنظيم كل مستندات المشروع Hard Copy & Soft Copy
• استغل شغلك في عمل أكبر قدر ممكن من العلاقات
• أكتر حاجة هتظهر شغلك للإدارة ورئيسك المباشر هي جودة إخراج التقارير
• نظم شغلك حتى لو المكان اللي شغال فيه مش منظم
• حاول تحترف كتابة المخاطبات وإرسال الإيميلات بطريقة احترافية
• وطد علاقتك بجميع أطراف المشروع
• اهتم بمظهرك عشان ده مهم في شغلنا
• ماتطلعش تفاصيل وأسرار شغلك لأي شخص داخل أو خارج الشركة
• حاول يكون كل شغلك موثق بالإيميلات
• طور نفسك في الـ English

google-playkhamsatmostaqltradent